版权声明

  原作载于《海山风情》系列（一），其著作版权归相应作者；本白话字译文授权协议为 知识共享许可协议 CC BY-NC-SA 3.0 CN。

虎踢石(HÓUᴺ-THEK-CHIO̍H)

Nguân-tsak: 毛 (Mô) 石明 (Chio̍h-mêng) ; 杨 (Yiôⁿ) 凤腾 (Hŏng-thêng)
Pńg-tī-uē: 海山 (Hái-suaⁿ) 老 (lău) 李 (Lí)

Hái-suaⁿ so̍k-uē tàⁿ-:

Buē seⁿ Tsu A-ngiâu, soiⁿ seⁿ Hóuⁿ-thek-chio̍h.

  Hái-suaⁿ N̂g-mâng-táu Chhiŏⁿ-phīⁿ-suaⁿ, suaⁿ-kha khò-hái ŭ kuá₊-kò tuā-chio̍h-kŏu; chio̍h-kŏu sio-oi liáu ta-ng seⁿ kâi tāng, tāng-lăi ou-thiⁿ-tī-àm. Hí-tsūn-soiⁿ, ngĭ-kun thâu-ló Tsu A-ngiâu sio-thâi kàn-su--nâng liáu tsáu kàu tāng-lăi, khai-tǹg lău-hóuⁿ sì-kha thí-khui pêⁿ-iōⁿ, tah-tuè tāng-téng nap-uh --kò, pī-khui kuaⁿ-piaⁿ liáu-ău tsáu-khṳ̀ Thâi-uan. Tshṳ́-tsăi Hóuⁿ-thek-chio̍h nguân-tsăi tŏ hái-kîⁿ-kha, niàⁿ tùi kâi-hái, tǹg-kuè mōⁿ-tio̍h hn̆g-hn̆g --kâi chhin-nâng hiò-seⁿ.

  Chheng-chhiâu Sŭn-tī nîⁿ_kan, Hái-suaⁿ N̂g-mâng-hioⁿ ŭ kâi lia̍h-hṳ̂-kiáⁿ-tĭ, sèⁿ Tsu, miâⁿ A-ngiâu, seⁿ-lâi thiⁿ-kûiⁿ-nâng-tuā, bâi_tshou ma̍k_tuā-lia̍p. Yi tsṳ̆-sòi tuè khûn-thâu-sai o̍h khang-khuè, sang-chhiú sái nŏⁿ-thûi, hḿ--khí-lâi hĭ_hŭ_lŭ_kiò; nŏⁿ-chiah chhiú-kóu tuā-tuā-tsat, tǹg ŭ tshoiⁿ-kṳn-la̍t. Jí-kâi Tsu A-ngiâu, tsṳ̆-liáu ŭ jîn-ngĭ, tsuan khòng-khà --nâng⁎ ûi-hui-tsak-tái, tú-tio̍h --nâng⁎ khùn-khóu zŭ kháng-khài kiù-chì, ŭ-kàu khuah-pak, thong-hioⁿ-lí o-ló --i.

  Tsu A-ngiâu sui-sĭ la̍t-siòⁿ lo̍h-hái, che̍k-ke háⁿ₊-sĭ khiau à tiàu-tiáⁿ. Tú-ngŏ thiⁿ-sî-uăⁿ, tshân-hn̂g bô-siu, bí-niôⁿ li kiaⁿ-nâng kùi, ke-tang lău-âi suà phuà-pēⁿ --tŏ, kâi sòi-muĕ tóu--khùn khàu m̆-hiah. Yin-âi siŏⁿ-lâi-siŏⁿ-khṳ̀ bô-huap, kiò A-ngiâu khṳ̀ Au-piⁿ-hioⁿ Au tsóng-kuán --kò chioh-chîⁿ kah chioh-bí-niôⁿ. Tsu A-ngiâu tuh-phoh m̆-khṳ̀; in-ŭi Au tsóng-kuán sĭ-kài Au-piⁿ-hioⁿ --kâi thóu-pà, hiá-nâng hiau-huêⁿ liáu tsuan-mn̂g khi-hŭ láu-sît-nâng; A-ngiâu bŏi-ngiàn khṳ̀ khiû --i. Lău-bó khǹg-kòi --i, tàⁿ-: “Ka-kī --kâi pió-ché-hu, boh-àiⁿ khui-tshùi ŭ --jio̍h-oh? Yiŭ m̆-sĭ chioh-liáu⁎ pe̍h-pe̍h-hiah, ĕ-jît nán lo-zŭ hôiⁿ --i.” A-ngiâu m̆-káⁿ nge̍k lău-bó --kâi ì, su̍t-su̍t kiâⁿ-khṳ̀ Au-piⁿ-hioⁿ.

  Au tsóng-kuán thóiⁿ-tio̍h⁎ A-ngiâu pâi-jît hêng-hêng-huă-huă kuè ke̍h-ma̍k, thiaⁿ --nâng⁎ pò-tsai i lâi tshuē --i, ló i pâng-lăi zŭ tuā-tuā-siaⁿ háu-tàⁿ-: “Àu-siâu-kiáⁿ! Lṳ́ suà tio̍h-lâi khiû --uá?” A-ngiâu thiaⁿ-liáu⁎ hué_to̍h, siŏⁿ-tàⁿ tò-tńg --khṳ̀, mo-sĭ lău-bó hun-hù --tŏ, chiàⁿ lia̍h sèⁿ-thâu ngĕⁿ teh--lo̍h-khṳ̀, kiâⁿ jîp-khṳ̀ pâng-lăi tàⁿ-tsai àiⁿ-lâi tsò-nî. Au tsóng-kuán ēng khuê-thâu-sìⁿ kho̍k A-ngiâu --kâi thâu-khak-lôu saⁿ-ē, kóng_chhèng-chhèng, sang-ma̍k biô-biô, chhiò-but-chhiò-but tàⁿ: “Tĭ--a-tĭ, lṳ́ mo ngĕⁿ-sèⁿ, tsò-nî tio̍h-lâi khiû --uá?” liáu kiò ke-nôu lia̍h A-ngiâu jiāu --tshut-khṳ̀. A-ngiâu khì à kă-khí-ngṳ̂n-kṳn, taⁿ-chiàⁿ boh phû-sèⁿ, liáu_li sîm-tio̍h⁎ ka-kī che̍k-nâng phah-su--nâng, kóu-tsò phîh_phn̍gh_kiò tò-tńg--khṳ̀.

  Tsu A-ngiâu tshâ-li kiâⁿ tshâ-li sîm: “Ŭ-chîⁿ-nâng sim-kuaⁿ ou à ba̍k, bô-àiⁿ tshap-tshái khiau-kiáⁿ chhin-chiâⁿ. Sì-tshù zṳ̂-ngiâu-ngiâu, kâi-kâi thó-lău-he̍k. Nâng ua̍h-ua̍h gīn-gō-sí, su-kuè tiâu-miāⁿ pùn-tiāu lâi khí-ngĭ, chiàⁿ bŏi tshûn tiâu khùi-si.” Taⁿ-chiàⁿ sim-kông-hué-jia̍t, tsò-tsai kiâⁿ-tńg kàu ka-kī hioⁿ-lí --kò, thiaⁿ-tio̍h --nâng⁎ ló îh_ua̍h_bó-jiáng, i sang-ma̍k mōⁿ-khṳ̀-kàu, sṳ̆-tn̂g-tsôiⁿ kuá₊-kâi khiau-kiáⁿ tĭ-hiaⁿ khṳh --nâng⁎ pa̍k --tŏ-kò. Che̍k-khûn sa tshâ-kùn --kâi niôⁿ-chhe, pìⁿ-mīn-pìⁿ-súi, háu-tuah tàⁿ kiò in kiáu-chîⁿ kah kiáu-bí-niôⁿ. Pâng-thâu-lău-tuā ló hí-piⁿ--thâu sio-tàu huah-chhit-tău-poih. Chhiu-mô-pìn-pe̍h --kâi Tsu Sì khiû in tàⁿ-: “N̂g-mâng nîⁿ-nîⁿ tsai-hng, liân tsháu-kṳn chhiū-phuê lo pit-pak-liáu, tsò ŭ chîⁿ-ngṳ̂n bí-niôⁿ hó kiáu--tit?” Niôⁿ-chhe sĕng kha that-tó Tsu Sì, lia̍h i phah à thòu-hueh-sí. Tsu A-ngiâu thóiⁿ--tio̍h, hué_to̍h-kàu-phiâⁿ, tshong buâ-khṳ̀ tsa̍t-tuè niôⁿ-chhe ăm-niáⁿ-thâu boh khai i thó tiâu-miāⁿ. Pâng-thâu-lău-tuā thóiⁿ-tio̍h⁎ A-ngiâu tshut-mīn, méⁿ-méⁿ huah-tàⁿ-: “Tsu A-ngiâu, Kūiⁿ-gê tsṳ̆-ŭ-tsú-chiang, sí-méⁿ pàng-chhiú!” A-ngiâu tàⁿ-: “Suah-nâng hôiⁿ-miāⁿ, tŏ-chhêng-tŏ-lí!” Hí-tshoh niôⁿ-chhe tshuah A-ngiâu tuaⁿ-nâng, tsò-che̍k-ē tshong buâ-khṳ̀ àiⁿ lia̍h --i. A-ngiâu khûn_tshuàⁿ kha_that, ku̍t à niôⁿ-chhe--hué zn̂g-kâi ou-chheⁿ-pŏng-chéng, lah-liáu⁎ tshuē-liâu.

  Tsu A-ngiâu ŏi-tsai jiò-seⁿ tsóng-tio̍h jiá-huă, zŭ tshuē tĭ-hiaⁿ--hué lâi tsham-siâng khí-ngĭ. Chèng-nâng khṳh hiá kuaⁿ-hú hāi à chhi-lău-tshám, kâi-kâi thiaⁿ-liáu⁎ chhiông_chhiông_kiò, tuaⁿ-tī Tsu A-ngiâu --kâi pió-tĭ Khóu Mêng táⁿ_sòi ùiⁿ-sṳ̄, pé-pa̍k tàⁿ-: “A-hiaⁿ, nán nâng_chió, ùiⁿ-tit oh-mue̍h; â-sĭ kuaⁿ-hú phài-piaⁿ lâi tia̍p --nán, kiáuⁿ-ùiⁿ nán lóng-tsóng tio̍h khṳ̀ sṳ̀-pài hu̍t-tsóu.” A-ngiâu tuah-tàⁿ-: “Tsău-huán kah tio̍h huân-ló tiâu-miāⁿ?!” Liáu, Tsu A-ngiâu kah khûn khiau-kiáⁿ tĭ-hiaⁿ zŭ liū-khí ngĭ-kî, jît-jît liān khang-khuè, tsún-pĭ kah kuaⁿ-piaⁿ sio-thâi.

  Tsok-tsok, niôⁿ-chhe--hué tsáu tńg-khṳ̀ Kūiⁿ-gê, pò-tàⁿ Hái-suaⁿ Tsu A-ngiâu ma̍k_bô-uâng-huap, pong-puăⁿ niôⁿ-chhe, kàu-phiâⁿ-nâng boh-àiⁿ tsău-huán. Kūiⁿ-lĕng thiaⁿ-liáu⁎ hué_to̍h, chiat-sî kiò piaⁿ-kiáⁿ tah-tsûn khṳ̀ Hái-suaⁿ lia̍h Tsu A-ngiâu, boh-àiⁿ thâi-koi_kà-kâu. Tsu A-ngiâu thiaⁿ --nâng⁎ pò-tsai, méⁿ-méⁿ tuà tĭ-hiaⁿ--hué sái-tsûn khṳ̀ kah in kàn tiāⁿ-tio̍h. Kuaⁿ-piaⁿ tsōi-kâi bŏi-năi huang-éng, tsûn sái buē-kàu Sam-sṳ̆, hiá-nâng tsá-tsá zŭ khṳh tsûn iô à tiām thòu, kâi-kâi ou-àm-hîn. Tsu A-ngiâu kiò-nâng bī-lo̍h-hái lia̍h tsûn-tói tsha̍k phuà-khang, tsûn che̍k-ē tîm, kuaⁿ-piaⁿ zn̂g-kâi thiàu-hái; chèng-tĭ-hiaⁿ ló tsûn-téng tsang₊ kùn lia̍h kuaⁿ-piaⁿ--hué lóng-tsóng hìn-hòng-sí.

  Tsu A-ngiâu thâu-pái kàn-iâⁿ, hioⁿ-lí-nâng su-ho̍k i ŭ-khiàu-tsúi iŭ ŭ-táⁿ, kâi-kâi lâi tâu --i, chiàⁿ kúi-jît --tiaⁿ, ngĭ-kun zŭ-ŭ saⁿ-peh-guā nâng. Tsu A-ngiâu hăm tĭ-hiaⁿ--hué tsham-siâng liáu, suán N̂g-mâng Lí-hṳ̂-suaⁿ lâi khí tsúi-chē, hău-lĕng tàⁿ Hái-suaⁿ kak-kò hioⁿ-tshng hí-tshù pá-tsháu --kâi lóng tio̍h kàu N̂g-mâng sio-hŭ khí tsúi-chē, bô-lâi --kâi tsŏ-sí. Au tsóng-kuán sah-tsò i-lăi ke-teng kâi-kâi hiau-hiông, kiò --nâng⁎ thuân-tàⁿ-: “Uá tsuan-tsuan kah lṳ́ jiá tsha̍t-kiáⁿ khioh-chhiû, --che̍k-jît nán tng-thâu-tùi-mīn thóiⁿ-su-iâⁿ.” A-ngiâu siŏⁿ-tio̍h⁎ Lí-hṳ̂-chē buē-chêng mue̍h sì-tît, hiá sèⁿ-thâu chèng₊-kuà1 chhiáⁿ teh--lo̍h-khṳ̀.

  Tsu A-ngiâu chhin-tsṳ̆ tuà-nâng sûn-thóiⁿ sì-ûi khí-tsúi-chē. --Che̍k-jît, thóiⁿ-kìⁿ kâi kng-chio̍h --kâi, chek-sin chhēng-liáu la̍h-lîh-la̍h-phua̍h, kò-hêng jiân-tǹg tsṳ-seng, A-ngiâu zŭ buâ-khṳ̀ mn̄g --i. Hiá-nâng kiaⁿ à khok_khok_tòng, liân thâu lo m̆-káⁿ tiòⁿ-taⁿ. Kha--thâu --nâng thòi i ìn-tàⁿ-: “Yi sĭ Suaⁿ-ĕ tuā-tshâi-tsú Tēⁿ uân-guā --kâi kiáⁿ, Tēⁿ Yiú-lûn, Tēⁿ siù-tsâi. Tēⁿ uân-guā huè-siaⁿ khah-kûiⁿ, uāⁿ-tsò siù-tsâi --lâi.” Tsu A-ngiâu tàⁿ-: “Lṳ́ taⁿ ŭ-tha̍k si-tsṳ, uá lâi tshut chiŏⁿ-lîn, lṳ́ káⁿ tùi a m̆-káⁿ?” Tēⁿ Yiú-lûn sòi-sòi-siaⁿ ìn-tàⁿ-: “Káⁿ.” Tsu A-ngiâu sîm-a-sîm, tàⁿ-: “Hui khî-lūi pit ù khî-lūi.” Tēⁿ Yiú-lûn chiat-sî tùi-tàⁿ-: “Sek sṳ-bûn tĕng tŏng sṳ-bûn.” Tsu A-ngiâu thóiⁿ i nîⁿ-huè sòi-sòi iŭ nńg-chiáⁿ, liáu_li lêng[-lāi] tsăi, zŭ pàng i tńg--khṳ̀. Tsò-tsai jiò-seⁿ, tin-tò jiá-huă, jí-tsat-tsṳ mān-ău chiàⁿ phue̍h.

  Kâi-gue̍h khiă-kha, Lí-hṳ̂-chē zŭ khí-tît, tsŏ-suaⁿ khò-hái, chē-chhiôⁿ iŭ kûiⁿ iŭ tn̂g, tăi--keh --súi-khùi; chē-tsôiⁿ ín tuā-tō --kâi tsúi ûi-chē, chē-ău ēng chhim-kau keh-tso̍h; guā-pôiⁿ ŭ tuā-suaⁿ, thôu-kàng-suaⁿ2 tshun tùi hái-phiâⁿ, sang-pôiⁿ pé--tŏ; tsúi-chē kah suaⁿ-téng, tn̂g-suaⁿ ǹg-sio-tùi; ta-ng sĭ kṳ̆n-hái lâi-uáng phâng-tău, hiá-tsûn lóng-tsóng tùi jí-kò kuè. Tsu A-ngiâu ún-tsŏ Lí-hṳ̂-chē, àiⁿ lia̍h hí-hái --kâi tsûn, gōi kuè chia̍h-tsúi; boh thò-siú li ŭ chē-chhiôⁿ tsa̍h-tuè, ún-tǹg-ún-tǹg. Tsu A-ngiâu háⁿ₊ kiò iaⁿ₊ pió-tĭ Khóu Mêng ló tsúi-chē sì-chiu-ûi-tńg chhī gô; che̍k-mêⁿ khûn-gô â-sĭ kiaⁿ--tio̍h sio-tàu kiò, hó ēng-tsò siú-keⁿ, ṳ̆-huâng khṳh --nâng⁎ sêng-mêⁿ kong chē.

  Tsṳ̆-ŭ Lí-hṳ̂-chē, Tsu A-ngiâu miâⁿ-thâu tuā à tang-nâm-pôiⁿ hái-kîⁿ zn̂g-kâi tsai-iáⁿ; kuaⁿ-tsûn thong-thong uan-lōu-tsáu; seng-lí-tsûn kìⁿ-tio̍h 朱 (Tsu) jī kîⁿ-hō, â-tio̍h buâ-khṳ̀ kiáu kuè-lōu-chîⁿ, â-bô bŏi-tit kuè.

  Tsài-kò phue̍h kūiⁿ-lĕng kiò piaⁿ-teng lia̍h Tsu A-ngiâu bŏi-sêng, chiu-jît hâiⁿ-sîn-tháu-tuā-khùi; taⁿ suà thiaⁿ-tàⁿ i khí-tsúi-chē, zú-kèng kiaⁿ-sim_kiaⁿ-miāⁿ. Kūiⁿ-gê sṳ-iâ sȁm-su̍h tàⁿ-: “So̍k-uē tàⁿ Hai-suaⁿ kheh-chhêng sî-saⁿ-sî, chin-tsai jiá hái-mīn kàu tsó-keh. Uá thàm-thiaⁿ tio̍h⁎ Au-piⁿ-hioⁿ Au tsóng-kuán kuè tham-sim, háⁿ₊ ngiàn tsò-kuaⁿ. Nán hó sàng chîⁿ-ngṳ̂n pun --i, jīm i kâi lok-khok kuaⁿ-ūi, liáu kiò i khṳ̀ kong-tu Tsu A-ngiâu.” Kūiⁿ-lĕng thiaⁿ-liáu tak-thâu tàⁿ hó.

  Au tsóng-kuán tsṳ̆-tsá zŭ boh-àiⁿ kah Tsu A-ngiâu uan-ke, taⁿ kūiⁿ-lĕng thóiⁿ-tŏng, tsai₊-tit3 ŏi tàⁿ-m̆-chiâⁿ? sim-lăi phah-pheⁿ tio̍h⁎ seng-kuaⁿ_huat-tshâi tio̍h-tio̍h jí-tsuā tiaⁿ. Yi sûi-sî ke-teng zn̂g-kâi kiò-kiò-buâ, chĕⁿ-chĕⁿ sêng-mêⁿ sái-tsûn tùi Lí-hṳ̂-chē --kò lâi. Tng-sî lông-le̍h la̍k-gue̍h-jī-tsa̍p, gue̍h-niôⁿ kng-kng, hái-mīn mông-mông, suà khí tuā-huang-tuā-éng. Tsûn taⁿ-chiàⁿ sái kàu tsúi-chē thâu-mīn_tsôiⁿ, Au tsóng-kuán sûi-chiat kiò tshoh-ke-teng chiŏⁿ-suaⁿ. Nâng kiâⁿ buē-kàu tsúi-chē, thiaⁿ-tio̍h⁎ hiá-gô chheⁿ-lím kiò; sop_che̍k-kiò pu-lô-siaⁿ tăi--keh --hiáng, chē-mn̂g phah-khui, Tsu A-ngiâu che̍k-chhiú lĭm che̍k-ki khong-long-thûi, tuà kàu-khûn-nâng tshong --tshut-lâi. Au tsóng-kuán thò m̆-lī, sĕng to lâi tói, liáu tsai₊-tit năi ŭ Tsu A-ngiâu che̍k-ē? i khṳh Tsu A-ngiâu che̍k-thûi bu̍t khṳ̀-kàu, thâu-khak-lôu tsò-che̍k-ē tshap-tshap-tshùi. Tsu A-ngiâu sèⁿ-thâu buē siau, lia̍h tiâu si[-sin] bu̍t ke saⁿ-ē, boh liáu[-tuàn] hí-hang₊-sî khṳh i ēng sìⁿ kho̍k thâu --kâi bú-zo̍k. Ke-teng--hué thóiⁿ-kìⁿ ke-tsú sí-khek-khek, kâi-kâi tshuē-liâu.

  Au tsóng-kuán --kâi kiáⁿ Au Sèng, hiau-hĕng tsáu ŏi-tit tshut, liáu siû kuè hái, kàu Kūiⁿ-gê khàu-chhi-khàu-tshám. Kūiⁿ-lĕng hiâm Au tsóng-kuán bô-lêng-ûi, kiò chhe-hia̍h lia̍h Au Sèng phah thó-sí, liáu chĕng i tshut gê-mn̂g; iŭ kiò sṳ-iâ siu-tsṳ khai chhiâu-thêng kò-kip.

  Tsài-phue̍h tng-sî khí Lí-hṳ̂-chē, Tsu A-ngiâu pàng i tńg--khṳ̀ --kâi Tēⁿ Yiú-lûn, ău-chhiú khṳ̀ kiaⁿ-siâⁿ kuáⁿ-kháu, tèng-tio̍h chìn-sṳ̆. Yi lóu-sí Tsu A-ngiâu zú-lâi zú-chhiàu, iŭ thiaⁿ-tàⁿ Jiâu-phêng kò-kip, liáu ló Kim-luân-tōiⁿ khai Sŭn-tī huâng-tì pín-tsàu, tàⁿ ke-hioⁿ so̍k-tsṳ hái-ho̍k tsôiⁿ-sàu, liáu_li ŭ-nâng puăn-luăn, boh-àiⁿ chhiáⁿ-mĕng lâi-khṳ̀ suah-húiⁿ, pò-tap huâng-ṳn. Sŭn-tī huâng-tì thiaⁿ-liáu tsún-tsàu, sûi-chiat sṳ̀ i piaⁿ-hû, phuah Tiê-chiu tī-hng kuaⁿ-piaⁿ lóng-tsóng kui i thóng-niáⁿ.

  Tēⁿ Yiú-lûn tuà-piaⁿ lâi-kàu Jiâu-phêng, iâⁿ-puâⁿ tì-tah ló Tuā-ò, hái-mīn che̍k-khài hong-tiāu, lâi-uáng bô-lŭn tsûn a-sĭ nâng, hăm-kâi lît-lia̍h--khí, m̆-àiⁿ --nâng⁎ tsai. Yi tsai-tiāⁿ Tsu A-ngiâu hiau-hiông, Lí-hṳ̂-chē iŭ ngĕⁿ-kha, pek-sèⁿ tin-tò oh-mue̍h, thàng-jît kah kun-sṳ tsham-siâng, liáu_li sîm-lâi-sîm-khṳ̀ sîm bô-hue-jī. --Che̍k-jît, piaⁿ-teng pò-tàⁿ Au Sèng tsôiⁿ-lâi khiû-kìⁿ, Tēⁿ Yiú-lûn thiaⁿ-liáu kiò i jîp--khṳ̀. Au Sèng khai Tēⁿ Yiú-lûn phue̍h-tàⁿ tsá-tsôiⁿ hí-tsat-tsṳ, Tēⁿ Yiú-lûn tshâ-li thiaⁿ tshâ-li hô-so --i. Kun-sṳ mn̄g Au Sèng tàⁿ boh kong Lí-hṳ̂-chē káⁿ-ŭ phuà-pōu, Au Sèng huê-pín tàⁿ-: “Lí-hṳ̂-chē hí-khou-ūi sì-chiu-ûi-tńg zn̂g-kâi hái-tsúi, kong --khí-lâi khak-sît oh pâi-pí; liáu kiam-kah che̍k-mêⁿ ŭ gô siú-keⁿ, zú-kèng oh-mue̍h. Uáⁿ₊-pĕ zŭ-sĭ khṳh hiá gô_kiò hāi-sí. Sĭ-tàⁿ àiⁿ phuà jiá keⁿ-gô, uá thuà-sĭ siŏⁿ-tio̍h⁎ ŭ-i-piàn.” Tēⁿ Yiú-lûn méⁿ-méⁿ mn̄g-tàⁿ-: “Tī-seⁿ mue̍h-huap?” Au Sèng buâ-khṳ̀ i hĭⁿ-khang-kha sȁm-su̍h, it-jī tàⁿ, Tēⁿ Yiú-lûn it-jī tak-thâu.

  Au Sèng boh-àiⁿ pò-chhiû, tiâu miāⁿ tsò-sêng thōu-tiāu, tá-pàn tsò thó-hái-nâng, kò chiah sam-pán zŭ tùi Hái-suaⁿ khṳ̀. Hí-hang₊-sî, Tsu A-ngiâu thóiⁿ-tio̍h⁎ hái-mīn kuá₊-jît bô-mih tsûn, khai-tǹg bô-hiò tùi-lōu, zŭ kiò Khóu Mêng sái chiah tsûn-kiáⁿ khṳ̀ hái sàu-lōu. Au Sèng kah Khóu Mĕng ló hái--kò sio-tn̄g --tio̍h, Khóu Mêng pún-lâi zŭ ùiⁿ-sí, Au Sèng che̍k-ē tàⁿ-tio̍h chhiâu-thêng phài tuā-kun lâi--kàu, iŭ ēng chîⁿ-ngṳ̂n kuaⁿ-cheh láu --i, Khóu Mêng tu-m̆-tuè zŭ suà tshó-chhiàng tàⁿ káu-gue̍h-chhiu-saⁿ mêⁿ--tsṳ̏ ta̍k-sí keⁿ-gô, liáu khui chē-mn̂g chih-chiap kuaⁿ-piaⁿ.

  Hí-mêⁿ, tang-pak-huang hiû_hiû_kiò. Tēⁿ Yiú-lûn niáⁿ tuā-kun ló Tuā-ò iû saⁿ-keⁿ-sî-hun khui-tsûn, buē-kàu sì-keⁿ zŭ kàu Lí-hṳ̂-chē. Hí-ē-mue̍h, Khóu Mêng sȁi-hiau kiò kha--thâu ngĭ-piaⁿ kiâⁿ-khui, chĕⁿ-chĕⁿ lia̍h khûn-gô tît-ta̍k-sí; che̍k-ē thóiⁿ-kìⁿ kuaⁿ-piaⁿ lâi--kàu, i zŭ phah-khui chē-mn̂g pàng in jîp--khṳ̀, háⁿ₊ phng jîp-khṳ̀ chē-lăi pàng-hué. Chē-lăi hiá ngĭ-kun khṳh --nâng⁎ tsak lêng-cheng, hun-kông-hun-náu sì-suàⁿ thâi. Tsu A-ngiâu che̍k-sî lo-ia̍h bô-piàn pâi-piaⁿ-pù-tīn, kóu-tsò sang-thûi ngĕⁿ-tît bu̍t, khai kuaⁿ-piaⁿ--hué pùn-seⁿ-sí. Khóu Mêng hí-muáⁿ tú-tshái ló chih-chiap kuaⁿ-piaⁿ, liáu ki-tshùi háⁿ₊ tiām háu-tàⁿ suah-tsha̍t, Tsu A-ngiâu thóiⁿ-liáu⁎ sim-sèⁿ-hué--to̍h, hiông-hiông tshong buâ-khṳ̀ che̍k-thûi lia̍h Khóu Mêng tûi khek-khiù.

  Tēⁿ Yiú-lûn thuân-lĕng tshoh-kuaⁿ-piaⁿ tàⁿ ûi-sí hí-kâi sang-chhiú khiâ khong-long-thûi --kâi, chhiat-iàu mó pun i tsáu--khṳ̀. Kuaⁿ-piaⁿ thiaⁿ-liáu⁎ hōm_che̍k-kiò tsò-che̍k-ē suah tùi Tsu A-ngiâu --kò khṳ̀. Tsu A-ngiâu phōiⁿ-sí[-miāⁿ] thâi-sí káng-tsháu-nâng, me-tsò sang-khûn lân-te̍k sì-chhiú, iŭ thâi à tho̍ih-m̆-lī, bô-i-piàn suah kàu chē-ău, thiàu chē-chhiôⁿ tshuē-tsáu, liáu tùi N̂g-mâng sai-nâm-pôiⁿ hái-phiâⁿ --khṳ̀. Tēⁿ Yiú-lûn sĭ-sĭ4 tuà kuaⁿ-piaⁿ khṳ̀ tia̍p --i.

  Hí-ē-mue̍h, thiⁿ taⁿ-chiàⁿ phah-pe̍h, hái-huang hiû_hiû_kiò, hái-éng hōm_hōm_kiò. Tsu A-ngiâu hiá la̍t ēng thó-liáu, chin-tsai ka-kī bô-piàn siû kuè hái, liáu siŏⁿ-tio̍h nou-kiáⁿ-sòi --hang₊-sî thit-thô --kâi chio̍h-tāng, tsai-tàⁿ tāng-lăi ŭ-hó tiàm--tit, zŭ méⁿ-méⁿ tsáu tùi hí-kò khṳ̀. Tsáu-kàu tāng-mn̂g-tshùi, Tsu A-ngiâu sîm-tiāⁿ, soiⁿ tsáu-khṳ̀ tsúi-chîh-kîⁿ, lia̍h hí-chhiú nŏⁿ-ki-thûi phiang-tiāu, chiàn-phâu khue-kah hám tsò che̍k-tu, liáu khin-kha-khin-chhiú tò-thò-kiâⁿ, thò jîp-khṳ̀ hiá ou-thiⁿ-tī-àm iŭ zn̂g-kâi ti-tu-keⁿ-si --kâi chio̍h-tāng-lăi.

  Tēⁿ Yiú-lûn tuà-piaⁿ tia̍p kàu hái-kîⁿ, thóiⁿ-tio̍h hái-phiâⁿ --kò hiá khong-long-thûi chiàn-kah phiang --tŏ-kò, siŏⁿ-tàⁿ Tsu A-ngiâu tâu-hái tsṳ̆-chĭn --khṳ̀. Taⁿ-chiàⁿ boh-àiⁿ hun-hù siu-piaⁿ, kun-sṳ pé-pa̍k tàⁿ hiá kha-chiah-ìn kâi-kâi tsôiⁿ_chhián ău_chhim, ùiⁿ-tit sĭ kiâⁿ-liáu⁎ tsài-kò sûn kha-chiah-ìn ta̍h tò-thò. Tēⁿ Yiú-lûn che̍k-thiaⁿ chhéⁿ-ngŏ, méⁿ-méⁿ kiò-tàⁿ sûn kha-chiah-ìn chhîm-tshuē.

  Tsu A-ngiâu ló chio̍h-tāng-lăi, sang-kha sang-chhiú tshun-khui, che̍k-kek-la̍t, khai lău-hóuⁿ tshun-ûn pêⁿ-iōⁿ thek-tuè tāng-téng. Tāng-mn̂g-tshùi --kâi ti-tu-keⁿ-si khṳh Tsu A-ngiâu hôi-tiāu, hiá ti-tu suà thiⁿ-tui la̍t-siòⁿ, che̍k-ē-kiáⁿ --tiaⁿ iŭ lia̍h ti-tu-măng kit-kat-buâ. Tēⁿ Yiú-lûn tia̍p kàu tāng-mn̂g-tshùi, kiò piaⁿ-teng kô-tiāu ti-tu-keⁿ-si jîp-khṳ̀ tshuē; i--nâng ŭ-kàu tît-ma̍k, tsai-tàⁿ tsôiⁿ-ău_tsó-iŭ sì-tshù tshuē, tsò-tsai Tsu A-ngiâu hí-ē-mue̍h chiàⁿ-chiàⁿ ló in thâu-khak-téng! Tēⁿ Yiú-lûn sîm-tio̍h⁎ têng-tsá tāng-mn̂g-tshùi kàu-ē ti-tu-keⁿ-si, siŏⁿ-tio̍h⁎ tāng-lăi tsóng-kài bô-nâng, sûi-ău thuân-lĕng siu-piaⁿ, tuā-kun tò-tńg Tuā-ò, iŭ siu-tsṳ khai chhiâu-thêng pò-sióⁿ.

  Kuaⁿ-piaⁿ tò-tńg-khṳ̀ liáu, Tsu A-ngiâu lī-khui chio̍h-tāng, tńg kàu Lí-hṳ̂-suaⁿ, thóiⁿ-tio̍h tsúi-chē lóng-tsóng khṳh hué sio-tiāu, năi-m̆-khṳ̀ ma̍k-tsap chheⁿ-lâu. Liáu-ău, Tsu A-ngiâu kiò-tsôi tshûn--lo̍h-lâi --kâi ngĭ-kun, pài-pia̍t hŭ-láu_hioⁿ-chhin, sái-tsûn tshut-hái --khṳ̀.

  Ău-chhiú, Tsu A-ngiâu kàu Thâi-uan khiă-khí. Chiàng₊-sî Thâi-uan tang-pak-pôiⁿ sèⁿ Tsu --kâi, tsōi-kâi sĭ-kài i --kâi kiáⁿ-sun, ŭ jīn Hái-suaⁿ N̂g-mâng tsò tsóu-chiă.

注：

1. chèng₊-kuà, 同 tsài-kò；又，再；前音 cheng/chèng/teng/tèng 多种读法，可能是 tsài-têng-kò 之类合音变化；
2. thôu-kàng, 亦作 gû-kàng-thôu，粘土；
3. tsai₊-tit, 如何能够；他处多读 tsăi-tit，也许是前音产生声调变化，也或许前音本为合音或发语词；
4. sĭ-sĭ, 即刻；赶快。
   

变更历史

更改日期	更改信息
2022-08-11	add internal comments about “Tēⁿ Yiú-lûn”
2022-08-11	adjust a few expressions
2022-08-10	LittleIslands_001.md complete
2022-08-08	adjust a few expressions, add paragraphs
2022-08-08	adjust a few expressions, add paragraphs
2022-08-07	add most of paragraphs of the forth page
2022-08-06	finish the third page
2022-08-05	adjust a few expressions, add paragraphs, add internal comments
2022-08-03	adjust a few expressions, add paragraphs
2022-08-02	finish the second page
2022-08-01	finish the first page
2022-07-31	add LittleIslands_001.md