Hut_che̍k-kiò, a-má lī uán khṳ̀ boh siám saⁿ-tsa̍p-nîⁿ --liáu. Tshṳ́-tsăi tsài-kò siŏⁿ--tio̍h, i hiá sin-iáⁿ háⁿ-sĭ chheng à tâng-kiàⁿ, tǹg-kuè nguân-tsăi kha-thâu-u aⁿ kò ou-pòu, tsŏ ló-kò thim-chéⁿ chhiah-măng.

  A-má, Nâm-ò nâng, hiaⁿ-tĭ-chí-muē pâi siăng-sòi, bô chiàⁿ-miâⁿ. Thiaⁿ-tàⁿ tsṳ̆-tsá uán a-kong lia̍h-hṳ̂ ua tùi Nâm-ò, a-má thóiⁿ-tio̍h a-kong seⁿ-hó, zŭ tsò pun a-kong.

  Têng uá ŏi hiáu nâng-sṳ̄, a-má zŭ khai-tǹg tiām seⁿ-tsò hí-kò-hêng, m̆-pat pìⁿ--kuè. Yi chhiâng-sî chhēng chhim-sek-saⁿ chhim-sek-khòu, hán-tit ŭ kìⁿ-tio̍h pa̍t-iōⁿ sek-sîn. Tṳ̂-liáu kah a-kong ŏi sio-mó --kúi-jît, a-má tùi uán jiá kiáⁿ-sun, hán-tit ŏi phû sim-sèⁿ-hué. Hí-hang₊-sî, i che̍k thóiⁿ-kìⁿ --uán, thâu-kù-uē zŭ-sĭ :” Nôu--ŏi. ”.

  Uá it-tit ŭ-che̍k-tsuā a-má khiau uáⁿ-muĕ khṳ̀ Nâm-ò guā-ke, kah pat ŭ-kâi Hok-kiàn pió-peh lâi sio-sûn, a-má kah in guā-ke zŭ bô-mih kau-kuà, tshûn hí che̍k-seⁿ-sì zn̂g-kâi tŏ Hái-suaⁿ khiă-khí.

  A-má, kū-tsá thiaⁿ-tàⁿ khṳh uán lău-má khóu hoh thiám, ău-tshái, kàu i kuè-sin, che̍k-sì-nâng phêng-phêng-huâm-huâm, lo-sĭ hiá hái-táu thó-hái-nâng-ke che̍k hŭ--nâng. Hí-ē-mue̍h, thim-chéⁿ chèng ŭ tsâng kim-ngṳ̂n-hue, i lia̍h i tǹg pó pêⁿ-iōⁿ, che̍k-ē khui-hue, keh-keh zŭ tiah lâi tsuaⁿ-tsúi pun tăi-ke-nâng tháu-liâng. Chhìn-thiⁿ-sî, i ŏi kek chiú-pôu, liáu bun chiú-pn̄g, chia̍h kàu uán kâi-kâi tsn̆g-tshùi-tsn̆g-chîh.

  Ău-bué, phuà-pēⁿ ău, pĕ-âi hun-hù tàⁿ khṳ̀ khǹg-kòi niáⁿ-má khṳ̀ tsò-chhiú-su̍t. Yi tàⁿ :” Sun--a, uá ua̍h kàu lă --liáu, taⁿ mài sái tak-nn̄g chîⁿ-ngṳ̂n! ”. Keh-jît, uá tńg-khṳ̀ tha̍k-tsṳ, ke-lăi-nâng zŭ tàⁿ i kuè-sin --khṳ̀. Tŏ uá lâi-siŏⁿ, i m̆-sĭ bô-àiⁿ ua̍h tsài kú-tn̂g, li-sĭ jiá sì_kan bô-ŭ mih-iōⁿ-kâi hó pun i khau-khat --tio̍h-liáu.