Tong-kok tsṳ-niôⁿ siăng khóu-miāⁿ --kâi sĭ lu̍t-huap m̆-tsún i--nâng húiⁿ-tiāu hun-ioh, tsŭ-sǹg chí-tsuang hun-ioh sĭ jī-ke tsò nou-kiáⁿ --sî tiāⁿ --lo̍h-lâi --kâi. Tŏ lī Suàⁿ-thâu1 ŭ se-su-kiáⁿ2 hn̆g --kâi che̍k-kâi lói-pài-tn̂g --kò, ŭ kâi tsa̍p-káu huè, seⁿ liáu ngiá-ngiá --kâi tsṳ-niôⁿ-kiáⁿ, tùi hṳ́-tshù thau-tsáu kàu uá chí-kò, liáu khiû uá siu i tsò tsáu₊-kiáⁿ. Yi tàⁿ nâ-sĭ chĕⁿ-chĕⁿ lia̍h i khǹg nā uá chiah tsûn --kò, liáu tuè uá tsáu, i ŏi tsò uá kâi nôu-po̍k ho̍k-sṳ̆ --uá. Yi tsṳ̆-sòi tsŭ pun --nâng⁎ tsò khṳh kâi ta-pou-kiáⁿ, liáu chí-kâi ta-pou-kiáⁿ phuà-tuā-pēⁿ, chhi-gî-kúi huáⁿ₊ ui bŏi-hó; tsŭ-sǹg m̆-pat kìⁿ-kuè chí-kâi ta-pou-kiáⁿ, i to ŏi tsai kò hêng kài-tio̍h jio̍h kiaⁿ-nâng, lêng-nguăn sí to m̆ kè --pun --i. Tsṳ-niôⁿ-kiáⁿ --kâi pĕ-bó bô siŏⁿ-àiⁿ tsò-chiâⁿ chí-tsuang hoh-tsōi nîⁿ tsôiⁿ tiāⁿ --lo̍h-lâi --kâi hun-ioh, liáu ta-pou-kiáⁿ --kâi pĕ-bó seⁿ-sí m̆-hàuⁿ. Tsṳ-niôⁿ-kiáⁿ --kâi âi kiò i khṳ̀ tsṳ̆-chĭn, tàⁿ tshûn3 chí-tiâu-lōu hó-kiâⁿ --tiaⁿ. Uá chhiah liáu kâi tong-nâng khṳ̀ kah hṳ́-kâi ta-pou-kiáⁿ --kâi pĕ-bó phue̍h, liáu, jīm phue̍h phue̍h m̆ tshái-tāi; uá iā tshuē kuè kuaⁿ-gê, liáu chiàⁿ-tsai, tsŭ-sǹg kâi sin-nn̂g chiòⁿ-seⁿ, i--nâng iā bô-iông-chhêng --nâng⁎ pé-pa̍k sin-niôⁿ kè-nâng. Chí-kâi nou-kiáⁿ --kâi miāⁿ-keh àiⁿ kói-kiù liân tiâu chiàⁿ-lōu to bô. Keh kuá₊ lói-pài ău, i khṳh --nâng⁎ lia̍h khṳ̀ in kong-má --kâi tshù-só --khṳ̀, keh-keh bô-jio̍h-kú uá tsŭ thiaⁿ-tàⁿ i sí--khṳ̀ --liáu. Uá m̆-tsai i kài-sĭ tshám-sí a-sĭ tsṳ̆-chĭn. Bô-lŭn sin-niôⁿ-kiáⁿ a-sĭ lău-tsṳ-niôⁿ, tsṳ̆-chĭn lân-tiang-sî to ŭ. Soiⁿ--kúi-nîⁿ, tŏ Suàⁿ-thâu kha--thâu kâi hioⁿ-lí --kò, chhit-kâi tsṳ-niôⁿ-kiáⁿ, tsham-siâng àiⁿ tsò-pû khṳ̀ tâu-hái. Lăi-pôiⁿ ŭ saⁿ-nâng taⁿ-chiàⁿ kè bô-kú, chiàu lī-so̍k tŏ i--nâng ta-kuaⁿ hṳ́-kò khiă-khí liáu sì-kâi gue̍h ău, tńg kàu guā-ke thóiⁿ i--nâng pĕ-bó_sang-chhin. Chí-khûn tsṳ-niôⁿ-kiáⁿ, tsṳ̆-sòi tsò-pû sńg, iŭ-sĭ tshù-piⁿ-thâu-bué, liáu i--nâng siŏⁿ tio̍h ŭ-piàn sio-tsŭ kuè huaⁿ-hí, chhĭⁿ4 tsò-che̍k-ē pháng-suàⁿ kah nn̂g-saⁿ-khòu. Sim-lăi-uē che̍k phue̍h --khí-lâi, kâi-kâi tàu chhi-tshám. Ŭ che̍k-nâng kè pun kâi kuh a-phiàn --kâi, hiá ta-pou, n̂g-sng-n̂g-sng5, thong-sin tshûn hù kut, thàng-jît nuàⁿ nā phou--kò khok_khok_tòng. Ŭ che̍k-nâng kè pun kâi hàuⁿ pua̍h-chîⁿ --kâi, hiá ta-pou, mêⁿ_suà-jît tiām tŏ phuà-ke. Ŭ che̍k-nâng --kâi ta-ke iŭ ngiâm-tiâu --lâi iŭ hiau-huêⁿ, khṳh i kuán-hat --tio̍h tshám kàu bŏi luh-ám. Chí saⁿ-kâi sin-niôⁿ-kiáⁿ ŭ-kàu tshám, liáu i--nâng lia̍h chhi-liâng-khóu-kéng lin-liau tsò-che̍k-ē, lĕng-guā sì-kâi buē-chêng-kè --kâi chí-muē tsham-siâng tàⁿ-, “Bô-kú-ău nán iā tio̍h chiòⁿ tshám. M̆-su-kuè6 lái-khṳ̀ sí --hó!” Tàⁿ-tît kâi-kâi tâng-ì, chĕⁿ-chĕⁿ tshó-chhiàng7 hó tsò-pû tsṳ̆-chĭn.

  Yin huâ-sǹg8 tio̍h chiàu lī-so̍k ĕ-tsuā tńg-lâi guā-ke --kâi jît-chí, tàⁿ-tiāⁿ chhit-gue̍h-tsa̍p-ngŏu hṳ́-mêⁿ tsò-che̍k-ē thau-tsáu. Sî kàu, ŭ la̍k-nâng chhēng sin-saⁿ, thâu-téng kat phau hue, sio-khan-chhiú sêng gue̍h lâi-kàu hái-kîⁿ-kha, ēng soh pa̍k tsò che̍k-ē tâu-hái --khṳ̀. Tŏiⁿ-chhit-nâng, chiàⁿ tsa̍p-saⁿ huè tuā --tiaⁿ, hṳ́-mêⁿ chhiau-tshuē sin-saⁿ tsak tio̍h nâng pun --nâng⁎ thóiⁿ--kìⁿ, liáu in âi méⁿ-méⁿ tsa̍h-tuè, m̆-tsún i tshut--khṳ̀. Yiû i chiàⁿ chhê tio̍h lĕng-guā la̍k-nâng, liáu, la̍k-nâng --kâi sin-si tshuē-tio̍h ău kám tŏ tâng-kâi phûn --kò. Chí-tshoh-kâi tsŭ-sĭ tŏ Tong-kok chiá hun-in-chì-tōu ĕ-kha kuè chek-ak liáu_li iā chia̍p(chhiâng-sî) kìⁿ--tio̍h --kâi chhi-tshám-sṳ̄.

[Tŏiⁿ 1 chioⁿ liáu.]

注：

  1. Suàⁿ-thâu, 汕头。后续篇章将采用今音 Suaⁿ-thâu；
  2. se-su-kiáⁿ, 些许；部分地方读 siam-su-kiáⁿ 等；
  3. tshûn, 只有，仅存；部分地方亦读 tshun；
  4. chhĭⁿ, 接近。近义者有读 chhîⁿ（chhîⁿ-chhiôⁿ-peh-piah），部分场合不能混用；
  5. n̂g-sng, 因长期疾病等导致皮肤失去光泽，也用于形容体弱多病（贬义）；
  6. m̆-su-kuè xxx, 亦读 m̆, su-kuè xxx ，即属于再强调 su-kuè，此处相当于 “要不然，不如 xxx”；
  7. tshó-chhiàng, 约定；
  8. huâ-sǹg, 估算。

前页 目录 后页


变更历史

更改日期 更改信息
2022-07-30 fix translation of “the seventh month”
2022-07-03 add comments
2022-07-02 seperate “kâi” & “–kâi”, though it’s almost the same for me.
2022-06-27 add PagodaShadowsPage009.md
2022-06-25 improve punctuation and add comments
2022-06-24 modified description of the time girls were to suicide
2022-06-24 fixed spelling of “opium” refering to William Duffus’ dictionary , though it’s not what I used to hear in my village before
2022-06-24 update PagodaShadowsPage006-008.md
2022-06-23 modified for style
2022-06-23 modified for style
2022-06-23 update PagodaShadowsPage006-008.md